ആഗോളമായി ഒരു ഓൺലൈൻ പേയ്‌മെന്റ് സംവിധാനം നടത്തുന്ന ഒരു അമേരിക്കൻ കമ്പനിയാണ് പേപാൽ ഹോൾഡിംഗ്സ് ഇങ്ക്, ഇത് പേയ്പാൽ എന്ന ചുരുക്കപ്പേരിൽ അറിയപ്പെടുന്നു. ഓൺലൈൻ പണ കൈമാറ്റത്തെ പിന്തുണയ്ക്കുകയും പരമ്പരാഗത പേപ്പർ രീതികളായ ചെക്കുകൾ, മണി ഓർഡറുകൾ എന്നിവയ്ക്ക് ഇലക്ട്രോണിക് ബദലായി പ്രവർത്തിക്കുകയും ചെയ്യുന്നു. ബാങ്ക് അക്കൌണ്ടിലൂടെയോ അല്ലെങ്കിൽ ക്രഡിറ്റ് കാർ‍ഡ് വഴിയോ പണം സ്വീകരിച്ചാണ് പണംകൈമാറ്റം ചെയ്യുന്നതും പണമൊടുക്കുന്നതും. പേയ്പാൽ സ്വീകർത്താവിന്‌ പേയ്പാലിൽ തങ്ങളുടേതായ നിക്ഷേപ അക്കൗണ്ട് സ്ഥാപിച്ചുകൊണ്ട് ചെക്കിന്‌ അപേക്ഷിക്കുകയോ അതല്ലെങ്കിൽ തങ്ങളുടെ ബാങ്കിലേക്ക് പണം മാറ്റം ചെയ്യുന്നതിനോ അപേക്ഷിക്കാം. ലോകവ്യാപകമായി ഇ-കൊമേഴ്സ് സൗകര്യമൊരുക്കി പണമിടപാടുകളിൽ മദ്ധ്യസ്ഥ സേവനം നടത്തുന്നതിന്റെ ഒരു ഉദാഹരണമാണ്‌ പേയ്പാൽ. Wikipedia