Biex nagħtuk riżultati siewja, l-ewwel jeħtieġ li nifhmu x'qed tfittex ー x'għandek f'moħħok li ssib. Biex naslu għal dan aħna nibnu sistemi tal-fehim tal-ilsna biex mill-ftit kliem li tikteb fil-kaxxa tat-tiftix, nippruvaw nifhmu kif nistgħu nuruk l-iktar kontenut siewi li għandna.

Il-proċess magħmul minn passi żgħar, bħal pereżempju li nifhmu u nsewwu l-iżbalji tal-ortografija, u passi ikbar fejn nużaw is-sistema sofistikata tas-sinonimi tagħna biex nibnu lista li tgħinna nsibu dokumenti siewja, anki jekk forsi ma jkollhomx kelma b'kelma dak il-kliem li fittixt int. Biex nagħtuk eżempju ー int jaf tkun fittixt "ibdel il-qawwa tad-dawl tal-iskrin tal-laptop" imma l-manifattur ikun uża "irranġa l-qawwa tad-dawl tal-iskrin tal-laptop" fl-istruzzjonijiet tiegħu. Is-sistemi tagħna jifhmu li l-kliem u l-intenzjonijiet huma l-istess u għalhekk jagħtuk il-kontenut is-siewi. Din is-sistema tnediet wara ħames snin ta' ħidma u sibna li ttejjeb ir-riżultati tat-tiftix fl-ilsna kollha b'iktar minn 30%.

Is-sistemi tagħna jippruvaw jifhmu wkoll ix-xorta ta' informazzjoni li tkun qed tfittex. Jekk tfittex kliem bħal "tisjir" jew "stampi", is-sistemi tagħna jifhmu li hemm probabbiltà ikbar li tixtieq issib xi riċetti jew ritratti. Jekk tfittex bil-Franċiż, il-biċċa l-kbira tar-riżultati li se nagħtuk se jkunu bil-Franċiż ー wisq probabbli hekk tkun qed tistenna. Is-sistemi tagħna jistgħu jagħrfu wkoll li ħafna tiftixiet jafu jkunu jeħtieġu riżultati marbuta mal-post fejn jinsab dak li jkun qed ifittex ー għalhekk meta tfittex "pizza", se nagħtuk riżultati li juru n-negozji fil-qrib li jistgħu jwasslulek il-pizza fejn tixtieq.

Jekk it-tiftixa tiegħek ikun fiha xi kliem ewlieni li jkun iktar popolari mis-soltu, is-sistemi tagħna jifhmu li l-aħħar informazzjoni taf tkunlek iktar siewja minn paġni b'informazzjoni eqdem. Dan ifisser li jekk tkun qed tfittex għal xi riżultati tal-isport, stqarrijiet dwar id-dħul tal-kumpaniji jew xi informazzjoni oħra li tkun għadha friska, aħna se nagħtuk l-aħħar informazzjoni.

Imbagħad is-sistemi tagħna jifhmu l-kontenut biex iqisu jekk għandux xi informazzjoni li tista' taqbel ma' dak li qed tfittex.

L-iktar sinjal ovvju li l-informazzjoni tkun siewja huwa meta l-kontenut ikollu l-istess kliem ewlieni li tkun fittixt. Fil-każ tal-paġni tal-internet, dan ifisser li dak il-kliem ewlieni jkun jinsab fuq il-paġna u jekk ikun jinsab fl-intestatura jew fis-silta ewlenija, aħna nqisu li l-informazzjoni taf tkun iktar siewja għalik.

Minbarra l-kliem ewlieni, is-sistemi tagħna jqisu wkoll jekk il-kontenut hux marbut mat-tiftixa b'modi oħra. Nużaw ukoll ġabriet ta' dejta anonimi dwar l-imġiba tal-utenti biex nifhmu jekk ir-riżultati tat-tiftix ikunux siewja għat-tiftix li jsir. Dik id-dejta tintuża bħala s-sisien ta' sinjali ġodda li jgħinu lis-sistemi tagħna jitgħallmu jifhmu aħjar is-siwi tal-kontenut. Aħseb ftit: meta tfittex il-kelma "klieb", wisq probabbli ma tkunx qed tfittex paġna bil-kelma "klieb" miktuba mitt darba. Għalhekk l-algoritmi jqisu jekk paġna jkolliex kontenut siewi ieħor — bħal ritratti, vidjows u anki listi ta' razez ta' klieb — u mhux il-kelma ewlenija "klieb" biss.

Importanti żżomm f'moħħok li filwaqt li s-sistemi tagħna ġew imfassla biex ifittxu dawn is-sinjali kwantifikabbli biex iqisu s-siwi tal-kontenut, dawn ma ġewx imfassla biex jifhmu ideat suġġettivi bħall-opinjonijiet jew ix-xaqlib politiku tal-kontenut tal-paġni.

Wara li jsibu kontenut ta' siwi, is-sistemi tagħna jippruvaw juru l-ewwel dak il-kontenut li jqisu li jkun jaqbel l-iktar mat-tiftixa. Biex jagħmlu hekk, is-sistemi jfittxu sinjali li jistgħu jgħinuhom jifhmu liema kontenut jidher l-iktar espert, ta' min joqgħod fuqu u ta' min jista' jafdah.

Wieħed mill-ħafna sinjali li nużaw biex nifhmu dawn il-ħwejjeġ huwa pereżempju kemm hemm siti tal-internet importanti li jsemmu jew għandhom ħoloq li jagħtu għall-kontenut. Maż-żmien rajna li fil-biċċa l-kbira tal-każijiet dan huwa sinjal li l-informazzjoni hija waħda li tista' toqgħod fuqha. Nużaw ukoll ir-riżultati ġenerali li joħorġu mill-proċessi tal-evalwazzjoni dwar il-kwalità ta' Tiftix biex inkomplu ntejbu l-mod ta' kif is-sistemi tagħna jqisu l-kwalità tal-informazzjoni.

L-informazzjoni bħal pereżempju l-post fejn tinsab, l-istorja tiegħek int u tuża Tiftix u l-għażliet ta' Tiftix kollha tgħinna niżguraw li r-riżultati li nagħtuk ikunu l-iktar riżultati siewja għalik dak il-ħin.

Aħna naddattaw ir-riżultati skont il-pajjiż u l-post fejn tkun tinsab. Jekk pereżempju tkun tinsab f'Chicago u tfittex "futbol", l-ewwel riżultati li Google wisq probabbli se tagħtik se jkunu riżultati marbuta mal-futbol Amerikan u Chicago Bears. Min-naħa l-oħra, jekk tfittex l-istess ħaġa f'Londra, Google se turik riżultati dwar il-futbol u l-Kampjonat Premier. L-għażliet ta' Tiftix bħal pereżempju l-ilsien li tagħżel jew jekk tagħżilx li tuża Tiftixa Sigura (għodda li taħbi l-kontenut espliċitu), jgħinuna nifhmu wkoll ix-xorta ta' riżultati li qed tistenna mingħandna.

Tiftix joffri wkoll xi faċilitajiet biex nagħtuk riżultati personalizzati skont kif tuża l-kont ta' Google tiegħek. Jekk pereżempju tfittex "avvenimenti qrib tiegħi", Google tista' taddatta xi suġġerimenti għax-xorta ta' avvenimenti li naħsbu li jafu jinteressawk.

Dawn is-sistemi jiġu mfassla biex naddattaw ir-riżultati li nagħtuk għal dak li jinteressak u ma jiġux imfassla bil-ħsieb li nifhmu dettalji sensittivi bħalma huma r-razza, ir-reliġjon jew il-partit politiku tiegħek.

Tista' tagħżel liema parti mill-imġiba tiegħek fuq Tiftix tista' tintuża biex intejbulek l-esperjenza tiegħek fuq Tiftix, fosthom li tibdel ix-xorta ta' dejta li tista' tintrefa fil-kont ta' Google tiegħek, billi żżur myaccount.google.com. Biex titfi l-personalizzazzjoni għall-kont tiegħek, itfi "Imġiba fl-Apps u fuq l-Internet".

Tista' wkoll tagħmel għażliet oħra marbuta mal-kontenut bħal Tiftixa Sigura mill-għażliet. Minn dawn l-għażliet tista' tagħżel jekk fir-riżultati tat-tiftix tiegħek għandux ikun hemm kontenut espliċitu li jista' jaħsad lil ċerti nies.